न भै अतुल न इन कै त नि ह्वे सकद स्वच्छ भारत।।

न भै अतुल न इन कै त नि ह्वे सकद

स्वच्छ भारत,

नौना तुमरा आलो- काचो छन खांणा,

बटों - बटों मा छन तब थुपडा लगाणा।

जैकु लग जखी लगणू वखी पिचकाणू,

भांती- भांती का बीमारियों धई लगाणू।

न भै अतुल न इन कै........

पीठ पैथर तुम पान गुटका खाई की,

पाल्यों- पाल्यों दीवालों फर छा धुकणा,

पीठ ऐथिर....

स्वच्छ भारत, स्वस्थ भारत कु

नारा छा लिखणा।

न भै अतुल न इन कै........

या...आ 

ब्वारी बेटी तुमरी, खौड-पात

बाटा- घाटों मा छन जमोणा,

अर भैंसा गाडा-गदीनों छा नहोणा।

नि ह्वे सकद स्वच्छ भारत,

सरकार पर छाँ तुम दोष देणा,

अर अफ तुम कुछ ज़िम्मेदारी नि छा लेणा।

न भै अतुल न इन कै त नि ह्वे सकद

स्वच्छ भारत।।

अतुल गुसाईं जाखी (सर्वाधिकार सुरक्षित)

 Date-23/2/2015